billy bragg & the blokes

Billy Bragg Ingalaterrako kantautore bat da, eta lehen diskoa, Life's A Riot, 1983an plazaratu zuen. Harrez geroztik, Ingalaterrako musikari ezagun eta estimatuenetako bat dugu. NMEek adierazi du Ingalaterrako rock olerkaririk esanguratsuenetakoa dela Billy; haren abestiek pop estiloari loturiko kanta azalekoei ihes egiten diete.

Billyk birak egin zituen mundu osoan 1983 eta 1993 bitartean, gehienetan bakarrik. Hamar urte horietan, disko batzuk grabatu eta haiek salmenta-zerrendetako lehen hamar postuetan izan ziren. The Smiths taldeko Johnny Marr-ekin, 10.000 Maniacs taldeko Natalie Merchant-ekin, Pete Seeger-ekin eta REM taldearekin aritu da. Beste musikari batzuek ere Billy-ren musika-lanak grabatu dituzte, hala nola, Kirsty McColl (“A New England”), Paul Young (“Man In The Iron Mask”) eta Dubstar (“St Swithins Day”).

Musika eta aldarte onaz gain, politika eta gizartearekiko konpromisoa ere ezagun zaizkio Billy-ri. “Red Wedge” musikari-elkartea sortu zuen. Paul Weller, Junior Giscombe eta Jimmy Sommerville, besteak beste, izan ziren elkarte horretako partaide, eta laboristen hautagaiei lagundu zieten 1987ko hauteskundeetan. Gainera, giza eskubideen defendatzaile sutsua da eta arrazismoaren aurkari amorratua.

Musika du Billyk bere lanaren alderdi nagusia; hala ere, astia hartzen du kazetari eta idazle lanetan aritzeko, gizarte eta politika gaien inguruan.

1996an, Woody Guthrie-ren alaba Norak gonbidatu zuen Billy Guthrie agiritegia bisitatzera. Han, New York-ek aitak konposatu baina sekula grabatu ez zituen ehunka abesti erakutsi zizkion. Jatorrizko doinuak Woody hiltzeaz batera galdu ziren, eta Norari bururatu zitzaion doinu berriak konposatzeko eskaera onartuko zuela Billyk. 1988an, Guthrie-ren omenezko kanta-testamentua osatu zuen Bragg-ek, Mermaid Avenue izenekoa, Wilco country-rock-eko amerikar taldearekin eta Natalie Merchant abeslariarekin. Disko hori Grammy sarietarako proposatu zuten, eta 90eko hamarkadako disko esanguratsuenen zerrendan jaso zuen Rolling Stone aldizkariak.

1999an, Bragg-ek diskoa aurkeztu zuen nazioarteko bira luze batean, Ingalaterrako The Blokes taldearekin (3 Mustapha 3, Fairground Attraction eta The Small Faces taldeetako kide ohiak), Australia, Ingalaterra, Japonia, Italia, Portugal eta beste hainbat lekutan. Urte horren amaieran, Reaching to the converted kaleratu zuen, hots, bere ibileraren erakusgarri diren bitxikerien bilduma. Halaber, Billyk Mermaid Avenue lanaren 2. alea argitaratu du, Wilco taldearekin batera, baita You Can Call Me Cupcake diskoa ere. Azkena Blokes taldearekin zuzenean grabaturiko diskoa da, eta kontzertuetan baino ezin da eskuratu.